إفتكارة سينيمائية

بدأ الصيف ، يعنى بدأت أفلام الصيف معروفة يعنى..دخلت أنا منهم 4 عمارة يعقوبيان،اوقات فراغ،عن العشق و الهوى و اللعنة ، نبدأ بالترتيب .

عمارة يعقوبيان فى رأيى كان ممل بالرغم من ان الرقابة عملت فيه شغل نضيف خاصة بالنسبة لمشهد التعذيب، و نهايته كانت مربكة يعنى وحيد حامد لقى انها وسعت منه و الفيلم داخل فى 3 ساعات قال اخلص نفسى فكانت النهاية التى لم تتناسب مع ريتم الفيلم و فى لحظات كتير من الفيلم كان بيختفى الارتباط بين الشخصيات و بعضها و الاحداث و بعضها فتظهر كانها مشاهد غريبة من افلام مختلفة و موسيقى خالد حماد لم تكن مفتكسة و لكنها كانت شغالة يعنى.

بالنسبة لأوقات فراغ كان فيلم جامد جدا جدا كنت حاسة انى بتفرج على نفسى، و بالنسبة لأول مرة كان تمثيل كريم قاسم هو الافضل فى رايى و اظهر قدرة و موهبة حلوين قوى، تلاه احمد حاتم و راندا البحيرى بالتساوى و لكن كان تمثيل عمرو عابد و صفا تاج الدين مفتعل قليلا و كثيرا فى بعض الاحيان و كان اخر مشهد استاذ كان معبر جدا و كانت موسيقى روبير خيرى بشارة من احسن الموسيقى التصويرية اللى سمعتها فى حياتى و اغنية مروان خورى برضه كانت حلوة و كانت اول مرة يلفت التتر نظرى بجد، يعنى فى رايى كان فيلم جامد..

اما عن العشق و الهوى فكان من اسوأ الافلام اللى شوفتها فى حياتى و خصوصا لان تامر حبيب سيناريست سهر الليالى هو اللى عمله مما سبب لى صدمة نفسية و خنقة، كان الفيلم ممل جدا و مش منطقى و كان يفتقر لاقل مقومات العمل الفنى المعقول و الموسيقى معلقتش معايا اساسا .

و اللعنة بقى كان حاجة كدة تنكة ماكانش فيه خط درامى واضح يعنى من الاخر شوية مشاهد مخيفة و خلاص زى معظم الافلام الامريكانى يعنى.

باقى الافلام بقى زى الغواص و زى الهوى ماشوفتهاش و مش عارفة اذا كان مسموح اسميها افلام اساسا ولا لا، لكن اداء وسط البلد فى عودة الندلة شجعنى انى اروحه لانى بحبهم يعنى.

و عامة الصيف لسة فى اوله و ياما حانشوف.